اوقات كتيرة يبقى مطلوب منك تعمل حاجة وتجى تعملها تلاقى نفسك قعدت فيها كتير
قوى وبعدين تتطلع النتيجة مش قد كده
قعدت مثلا تذاكر 3 ساعات وتكتشف انك يدوبك خلصت 10 صفحات او قعدت تقرا كتاب فى ساعتين وبعدين اكتشفت ان اللى استفدته ولا حاجة او شغال فى مشروع وبعدين اكتشفت انك قعدت كتير قوى ولسه محققتش حاجة
ومش هتحقق فيه حاجة عالمدى القريب
يا ترى ده بيحصل ليه ؟
اكيد ممكن يكون فى اسباب خارجة عن ارادتك بس برضه احيانا كتير ومن الاسباب المهمة ان احنا بنقضى وقت كتير فى حاجات مش مفيدة للمهمة اللى بنعملها
القاعدة : متعملش الا الضرورى لمهمتك بس
متضيعش وقتك اكيد الكلام سهل بس التنفيذ صعب دى خطوات تساعدك على كده
اولا حدد الهدف اللى انت عايزه من المهمة دى
لو حددت الهدف اللى انت عايز تطلع بيه اكيد هتقدر تحدد الحاجات الضرورية و الحاجات الغير ضرورية للمهمة بتاعتك
لازم يبقى هدفك واضح ومحدد
مثال : انا هقعد اذاكر ساعتين !
حدد هتذاكر ايه فى الساعتين بدل متقضيهم حيران وعمال تنقل وتفكر
عايز تنجز ايه بالظبط ؟
ثانيا : اكتب الهدف من مهمتك فى مكان واضح
الكتابة هنا عشان احنا غالبا بمجرد منبتدى الشغل بننسى احنا عايزين ايه وهدفنا كان ايه
لو رايح محل ملابس او بقالة اكتب اللى انت عايزه فى ورقة فى جيبك عشان تبقى عارف انت عايز ايه بالظبط ولا بتشتغل عاكمبيوتر ممكن تكتب اللى انت عايز تعمله عالديسكتوب فى google widget مثلا
لو هتذاكر اكتب اللى انت عايز تذاكره فى جدول او نوته
ثالثا : خليك فى التراك !
غالبا وانت فى بتشتغل فى المهمة بتاعتك ممكن تسرح تخرج بره التراك وتلاقى نفسك بتعمل مهام اضافية او حاجة مش مهمة للشغلانة بتاعتك عشان كده لازم تفكر نفسك كل فترة مثلا لو المهمة بتاعتك مدتها ساعة ممكن كل ربع ساعة تسال نفسك اللى بعمل دلوقتى هبساعدنى انجز ولا انا خرجت برا الموضوع
رابعا حط اشارات عالتراك وخط احمر
اعمل لنفسك خط احمر بمعنى وقت محدد الساعة 2 هاكون خلصت كذا طول ما انت عارف انك قدامك ميعاد معين هتقف فيه هتحاول تنجز اكتر كمان اعمل لنفسك اشارات عالطريق لو المهمة بتاعتك ساعتين يبقى انت المفروض كل نص ساعة تكون عملت كذا بالطريقة دى هتعملك دافع انك تنجز وتخلص وكمان هتنيك فى التراك
خامسا : انتدب
بمعنى ان مش كلها حاجة عايزاك انت لو بتشتغل فى شركة وفى مهام طلعت وانت شغال فى مهمة اساسية خلى اى حد تانى يشتغل المهمات الضافية دى مش لازم تعملها بنفسك
لو بتذاكر والبيت طلب حاجة ممكن اخو كاو اختك او اى حد تانى فاضى هو اللى يعملها
سادسا : اقف لما تخلص
لو المهمة مدتها ساعتين وخلصتها فى ساعة ونص مش لازم تضيع النص ساعة الباقية
ليست هناك تعليقات:
إرسال تعليق